सिड्नी — अष्ट्रेलियाको Liverpool City Council अन्तर्गत पर्ने साउथ वार्डमा रिक्त पदका लागि आगामी १८ अप्रिल २०२६ मा हुने उपनिर्वाचनमा नेपाली समुदायका अगुवा देवबहादुर गुरुङ ले उम्मेदवारी दिएका छन्। उनले कम्युनिटी भ्वाइस अफ अष्ट्रेलिया बाट आफ्नो उम्मेदवारी घोषणा गरेका हुन्।
साउथ वार्डका उपप्रमुख बेट्टी ग्रिन, लिभरपुल, न्यू साउथ वेल्स, अष्ट्रेलिया ले स्वास्थ्य कारण देखाउँदै कार्यकालकै बीचमा राजीनामा दिएपछि उक्त पद रिक्त भएको हो। सोही पदपूर्तिका लागि हुने यस उपनिर्वाचनमा लेबर, लिबरलसहित स्वतन्त्र गरी ११ जना उम्मेदवारहरू प्रतिस्पर्धामा रहेका छन्।
लामो समयदेखि अष्ट्रेलियामा बसोबास गर्दै आएका गुरुङ नेपाली समुदायसँग नजिकिँदै सामाजिक सेवामा सक्रिय रहँदै आएका छन्। उनले British Army तथा Australian Defence Force मा ३० वर्षभन्दा बढी सेवा गरेका छन्। लिभरपुल क्षेत्रमा स्थायी बसोबास गर्दै आएका उनी स्थानीय समुदाय, परिवार, व्यवसाय तथा भावी पुस्ताका आवश्यकताबारे जानकार व्यक्तिका रूपमा चिनिन्छन्।
निर्वाचित भएमा गुरुङले काउन्सिल दरलाई न्यायोचित र जिम्मेवार बनाउने, फोहोर तथा फोहोर व्यवस्थापन सुधार गर्ने, सडक, फुटपाथ, पार्क तथा खेलकुद पूर्वाधार सुदृढ गर्ने योजना अघि सारेका छन्। साथै सामुदायिक सम्पत्तिलाई अनावश्यक निजीकरणबाट जोगाउने, सार्वजनिक स्थलहरू सबैका लागि सुलभ बनाउने, नयाँ पूर्वाधार विकासमा जोड दिने र स्थानीय रोजगारी सिर्जनामा प्राथमिकता दिने उनको प्रतिबद्धता रहेको छ।
पारदर्शिता, जवाफदेहिता र जनमुखी नेतृत्वलाई अभियानको मुख्य आधार बनाएका गुरुङले साउथ वार्डका मतदातालाई १८ अप्रिलमा मतदान गरी आफूलाई विजयी बनाउन अपिल गरेका छन्। उक्त क्षेत्रमा नेपाली समुदायको पनि उल्लेख्य बसोबास रहेको छ।
यसअघि अष्ट्रेलियामा नेपाली मूलका भद्रा वाइवा र सुक्रिती भट्टले काउन्सिल निर्वाचन जितेर प्रतिनिधित्व गरिसकेका छन्, जसले नेपाली समुदायका लागि प्रेरणादायी उदाहरण प्रस्तुत गरेका छन्।
