सभापति रवि लामिछानेलाई थुनामै राख्ने सर्वोच्च अदालतको आदेशपछि राष्ट्रिय स्वतन्त्र पार्टी (रास्वपा) ले पार्टीको उच्च तहका बैठकहरू बोलाएको छ । सर्वोच्च अदालतले शुक्रबार लामिछानेलाई थुनामुक्त गर्नुपर्ने मागसहित दायर गरिएको बन्दी प्रत्यक्षीकरण रिट खारेज गरेपछि रास्वपा सचिवालयको आकस्मिक भर्चुअल बैठक बसेको हो ।
बैठकले उत्पन्न परिस्थितिबारे गम्भीर छलफल गर्न थप बैठक आह्वान गरेको पार्टीले जनाएको छ । रास्वपाका अनुसार आज दिउँसो ३ बजे पुनः सचिवालयको भर्चुअल बैठक र त्यसपछि ४ बजे केन्द्रीय समिति बैठक बस्ने कार्यक्रम तय भएको छ ।
यसैबीच, रास्वपाले आइतबार दिउँसो २ बजे पार्टी केन्द्रीय कार्यालयमा केन्द्रीय समिति बैठक आह्वान गर्ने निर्णय पनि गरेको छ । पार्टीभित्र नेतृत्व, संगठन र आगामी रणनीतिलाई लिएर गहिरो छलफल हुने अपेक्षा गरिएको छ ।
शुक्रबार सर्वोच्च अदालतको संयुक्त इजलासले उच्च अदालत तुलसीपुरको बुटवल इजलासको आदेश सदर गर्दै, सुप्रिम सहकारी ठगी प्रकरणमा लामिछानेलाई पुर्पक्षका लागि थुनामा राख्नुपर्ने आदेशलाई यथावत् राखेको थियो ।
