काभा वुमन्स नेसन्स भलिबलको फाइनलमा बुधबार नेपालले भारतको सामना गर्नेछ। नेपालले सेमिफाइनलमा इरानलाई मंगलबार ३-० को सोझो सेटमा हराउँदै फाइनलमा प्रवेश पक्का गरेको हो।
यो रोमाञ्चक फाइनल भिडन्त बुधबार साँझ ५ बजे दशरथ रङ्गशालाको कभर्डहलमा हुनेछ। नेपालले सेमिफाइनलमा इरानलाई २५-२१, २८-२६, र २५-२० ले हराउँदै लिग चरणमा इरानसँगको पराजयको बदला लिएको थियो। लिग चरणमा इरानले नेपाललाई पाँच सेटमा हराएको थियो।
समूह चरणमा नेपाल र भारतको खेल अत्यन्तै प्रतिस्पर्धात्मक बनेको थियो। पहिलो सेट नेपालले २५-१८ ले जितेको थियो, दोस्रो सेट भारतले २५-१२ ले जित्दा, तेस्रो सेट नेपालले २५-१७ ले जितेको थियो। चौथो सेट १८-२५ ले गुमाएको नेपालले अन्तिम पाँचौं सेटमा १५-१३ ले जित्दै ऐतिहासिक विजय प्राप्त गरेको थियो।
समूह चरणमा मात्र नेपालसँग पराजित भएको भारतले मङ्गलबार श्रीलङ्कालाई २५-१५, २५-१६, २५-२३ को सोझो सेटमा हराएर फाइनलमा स्थान पक्का गरेको हो। भारतविरुद्ध समूह चरणमा ऐतिहासिक जित निकालेको नेपाल उपाधि जित्ने लक्ष्यका साथ फाइनलमा उत्रने तयारीमा छ।
नेपाली खेलाडीहरूको उच्च मनोबल र उत्कृष्ट प्रदर्शनले समर्थकहरूलाई उत्साहित पारेको छ, र सबैको ध्यान अब यस महत्त्वपूर्ण खेलमा केन्द्रित छ।
