काठमाडौँ: राष्ट्रिय योजना आयोगका उपाध्यक्ष डा मीनबहादुर श्रेष्ठसँग संयुक्त राष्ट्रसङ्घ नेपालका लागि आवासीय संयोजक हाना सिङ्गर हृयाम्डीले भेटवार्ता गर्नुभएको छ । सिंहदरबारस्थित योजना आयोगको कार्यालयमा पुगेर आवासीय संयोजक हानाले उपाध्यक्ष डा श्रेष्ठसँग भेटवार्ता गर्नुभएको हो ।
भेटवार्तामा आगामी आर्थिक वर्षदेखि लागू हुने १६औँ योजनाको कार्यान्वयन, आगामी आर्थिक वर्षको बजेट, अतिकम विकसित मुलुक (एलडिसी)बाट विकासशील मुलुकमा स्तरोन्नति हुने तयारी साथै दिगो विकास लक्ष्य प्रगति समीक्षा विषयमा छलफल भएको थियो । साथै आगामी जुलाईमा अमेरिकाको न्यूयोर्कमा हुने उच्चस्तरीय राजनीतिक फोरममा नेपालको सहभागिताका विषयमा समेत छलफल भएको थियो ।
उक्त नेपालको तेस्रो दीगो विकास लक्ष्यसम्बन्धी स्वेच्छिक राष्ट्रिय समीक्षा (भिएनआर) प्रतिवेदन पेस हुनेछ । यसअघि उक्त भिएनआर प्रतिवेदन पहिलो सन् २०१७ र दोस्रो सन् २०२० मा प्रस्तुत भएको थियो । त्यस अवसरमा संयुक्त राष्ट्रसङ्घले हालसम्म गर्दै आएको सहयोगका लागि धन्यवाद दिँदै उपाध्यक्ष श्रेष्ठले १६औँ योजना कार्यान्वयन र आयोगको क्षमता अभिवृद्धिका लागि हुने सहयोगको निरन्तरताका लागि हानासँग अनुरोध गर्नुभयो ।
