सरकारले संविधान संशोधनसम्बन्धी औपचारिक तयारीलाई तीव्रता दिँदै ‘संविधान संशोधन बहस पत्र तयारी कार्यदल (२०८२)’ मार्फत सरोकारवालासँग छलफल प्रक्रिया अघि बढाएको छ ।
प्रधानमन्त्री वालेन्द्र शाह (बालेन)का प्रमुख राजनीतिक सल्लाहकार असिम शाहको संयोजकत्वमा गठन गरिएको उक्त कार्यदलले आज वरिष्ठ अधिवक्ता तथा अन्य कानुन व्यवसायीसँग विस्तृत छलफल गरेको छ ।
प्रधानमन्त्री तथा मन्त्रिपरिषद्को कार्यालयमा जारी बैठकमार्फत संविधान संशोधनसम्बन्धी विषयमा कानुनी तथा नीतिगत सुझाव संकलन भइरहेको छ ।
यसअघि हिजो मात्र कार्यदलले संविधानविद्हरूसँग प्रारम्भिक परामर्श गरेको थियो । मन्त्रिपरिषद्को २०८२ चैत १६ गतेको निर्णयअनुसार गठन भएको कार्यदलले वैशाख १० गतेको बैठक निर्णयलाई आधार मानेर परामर्श प्रक्रिया विस्तार गरेको हो ।
कार्यदलले विभिन्न सरोकारवालाबाट प्राप्त सुझाव संकलन गरी संविधान संशोधनसम्बन्धी विस्तृत बहस पत्र तयार पार्ने र त्यसलाई सरकारसमक्ष पेश गर्ने तयारी गरेको जनाएको छ ।
