चितवनको भरतपुर महानगरपालिका-१६ शिवघाटस्थित नारायणी नदीको बीच भागमा फसेका २२ जनालाई सशस्त्र प्रहरीले सकुशल उद्धार गरेको छ ।
नदीमा गिट्टी बालुवा निकाल्न बनाइएको अस्थायी बाँध अकस्मात भत्किँदा उनीहरू नदीको टापुमा फसेका थिए । उनीहरू नदीको बीचमा फसेको सूचना पाउनासाथ सशस्त्र प्रहरी बल, नेपाल नम्बर १७ गण चितवनबाट सशस्त्र प्रहरी निरीक्षक चामनारायण महतोको कमाण्डमा गोताखोरसहितको उद्धार टोली घटनास्थल पुगेको थियो ।
टोलीले बोटको सहायताले सबै २२ जनालाई सुरक्षित रूपमा बाहिर निकालेको सशस्त्र प्रहरीका सह-प्रवक्ता शैलेन्द्र थापाले जानकारी दिए ।
यसै क्रममा गिट्टी बालुवा ओसार्न प्रयोग गरिएको एउटा टिपर भने बाँध भत्किएको स्थानमा डुबेको छ ।
