प्रधानमन्त्री सुशीला कार्की राजकीय जिम्मेवारीबाट अलग हुने तयारीमा रहेकी छन् । नयाँ सरकार गठन नहुँदै प्रधानमन्त्री कार्कीले राजकीय जिम्मेवारीबाट अलग हुने तयारी गरेकी हुन् ।
शुक्रवार प्रस्तावित प्रधानमन्त्री बालेन शाह प्रधानमन्त्री पदमा नियुक्ति हुनेछन् । उनको सोही दिन शपथ ग्रहण गर्ने तयारी गरिएको छ ।
नयाँ सरकार र नयाँ प्रधानमन्त्री नबन्दै अन्तरिम सरकारकी प्रधानमन्त्री कार्कीले औपचारिक जिम्मेवारी छाडिसकेकी छन् । स्रोतका अनुसार प्रधानमन्त्री कार्की अब प्रधानमन्त्री तथा मन्त्रिपरिषद् कार्यालय आउने छैनन् । स्रोतले दिएको जानकारी अनुसार कार्की सिंहदरबार स्थित कार्यालय गएकी छैनन् । कार्यालयमा रहेका उनका व्यक्तिगत सामग्रीसमेत सचिवालयका कर्मचारीहरूले व्यवस्थापन गरिसकेका छन् ।
यसैबीच बालुवाटार स्थित प्रधानमन्त्री निवासबाट कार्की परिवारले आफ्ना सम्पूर्ण सामान टोखा स्थित निजी निवासमा सारिसकेको छ ।
केही दिनयता टोखास्थित निवासमा सुरक्षाकर्मीका लागि आवश्यक संरचना तयार गर्ने कामसमेत भइरहेको जनाइएको छ ।
यसअघि पूर्वप्रधानन्यायाधीश रहेकी कार्की अब पूर्वप्रधानमन्त्रीको हैसियतमा रहने भएकाले उनको सुरक्षाका लागि अतिरिक्त व्यवस्था गर्न लागिएको हो ।
