वेलिङ्टन । न्युजिल्यान्ड सरकारले इरानमा बिग्रँदै गएको सुरक्षा अवस्थालाई मध्यनजर गर्दै शुक्रबार तेहरानस्थित आफ्नो दूतावास अस्थायी रूपमा बन्द गरेको छ । साथै, त्यहाँ कार्यरत आफ्ना कूटनीतिक कर्मचारीहरूलाई सुरक्षित रूपमा बाहिर निकालिएको जानकारी दिएको छ ।
विदेश मन्त्रालयका प्रवक्ताका अनुसार कूटनीतिक कर्मचारीहरू रातारात व्यावसायिक उडानमार्फत सुरक्षित रूपमा इरानबाट बाहिरिएका हुन् । इरानमा सुरक्षा अवस्था निरन्तर बिग्रँदै गएकाले तेहरानस्थित दूतावासको सञ्चालन हालका लागि टर्कीको अङ्कारामा सारिएको मन्त्रालयले जनाएको छ ।
प्रवक्ताले भने, “हामी इरानतर्फ हुने सबै प्रकारका यात्राविरुद्ध सल्लाह दिन निरन्तर जारी राखिरहेका छौँ । हाल इरानमा रहनुभएका कुनै पनि न्युजिल्यान्डवासी नागरिकहरूलाई यथाशीघ्र देश छोड्न आग्रह गर्दछौँ ।” उहाँका अनुसार हालको परिस्थितिमा विदेश मन्त्रालयसँग इरानमा रहेका न्युजिल्यान्डवासीहरूलाई कन्सुलर सहयोग उपलब्ध गराउने क्षमता अत्यन्त सीमित मात्र रहेको छ ।
विदेश मन्त्रालयले इरानमा गम्भीर सञ्चार चुनौतीहरू देखिएको पनि जनाएको छ । ती चुनौतीका कारण त्यहाँ रहेका मानिसहरूलाई आफ्ना परिवार र साथीहरूसँग सम्पर्क गर्न निकै कठिन भइरहेको प्रवक्ताले बताए । मन्त्रालयले इरानमा रहेका न्युजिल्यान्डवासीहरूलाई सकेसम्म आफ्ना आफन्त तथा नजिकका व्यक्तिसँग सम्पर्कमा रहन सल्लाह दिएको छ ।
यसैबीच, न्युजिल्यान्डका विदेशमन्त्री विन्स्टन पिटर्सले बिहीबार इरानको राजधानी तेहरानमा भएको विशाल सरकारविरोधी प्रदर्शनप्रति सुरक्षाबलले दिएको हिंसात्मक प्रतिक्रियाबाट आफ्नो देश ‘गहिरो रूपमा स्तब्ध’ भएको प्रतिक्रिया व्यक्त गरेका छन् ।
उनले जारी गर्नुभएको विज्ञप्तिमा भने, “प्रदर्शनकारीहरूको हत्यासहित इरानका सुरक्षा बलहरूले गरिरहेको क्रुर दमनको हामी कडा शब्दमा निन्दा गर्दछौँ ।” मन्त्री पिटर्सले इरानी जनतालाई शान्तिपूर्ण रूपमा विरोध प्रदर्शन गर्ने, अभिव्यक्ति स्वतन्त्रता उपयोग गर्ने र सूचनामा पहुँच प्राप्त गर्ने मौलिक अधिकार रहेको उल्लेख गर्दै ती अधिकारहरू हाल निर्ममतापूर्वक दमन भइरहेको बताए ।
उनले भने, “न्युजिल्यान्ड सरकार इरानमा विकसित भइरहेको अवस्थाप्रति अत्यन्त गम्भीर चिन्तित छ ।” सो चिन्ता वेलिङ्टनस्थित इरानी दूतावासमार्फत प्रत्यक्ष रूपमा व्यक्त गरिएको र आगामी दिनहरूमा पनि कूटनीतिक माध्यमबाट आफ्ना धारणा स्पष्ट रूपमा राखिरहने उनले जानकारी दिए ।
