पृथ्वी राजमार्ग बस सञ्चालक कम्पनी प्रा.लि.का अध्यक्ष एनकुमार साईले जेन-जी आन्दोलनले नेपालको पर्यटन क्षेत्रमा गम्भीर असर पारेको बताएका छन् । आन्तरिक र बाह्य दुवै पर्यटकको आवागमनमा कमी आउँदा यस क्षेत्रमा सुस्तता छाएको उनको भनाइ छ ।
साईका अनुसार जेन-जी आन्दोलनको त्रासका कारण आन्तरिक पर्यटकहरू घरबाहिर निस्कन डराइरहेका छन् । त्यस्तै, नेपालको वर्तमान परिस्थिति र भविष्यमा के हुन सक्छ भन्ने अनिश्चितताका कारण बाह्य पर्यटकहरूको आगमन पनि पातलिएको छ । ‘पर्यटन क्षेत्र जेन-जी आन्दोलनसँगै सुस्ताएको छ,’ उनले भने, ‘आन्दोलनअघि पृथ्वी राजमार्ग हुँदै दैनिक सयभन्दा बढी पर्यटक यात्रा गर्थे, तर अहिले त्यो संख्या निकै घटेको छ । जसका कारण पर्यटक बोक्ने बसहरूले काम पाउन सकेका छैनन् ।’
तिहारपछि अझ ठूलो आन्दोलन हुने हल्लाले पनि मानिसहरूलाई घरभित्रै बस्न बाध्य पारेको उनले बताए । ‘देशको स्थिति के हुन्छ भन्ने थाहा छैन । तिहारपछि ठूलै आन्दोलन हुन्छ भन्ने समाचारले गर्दा मान्छेहरू बाहिरबाट आउन रोकिएका छन्,’ साईले थपे, ‘बाटोमा प्रहरीहरू देखिएका छैनन् । आन्दोलनका कारण उनीहरू पनि तहसनहस भएका छन् । पहिलाको जस्तो सुरक्षा छैन ।’
यातायात व्यवसायीहरू यात्रुहरूलाई गन्तव्यसम्म पुर्याउन सचेत रहेको उनले जानकारी दिए। चर्को भाडा नलिने र ओभरलोड नगर्ने ग्यारेन्टीसहित पृथ्वी राजमार्गमा सवारीसाधन सञ्चालन भइरहेको उनको दाबी छ । उनले यात्रुहरूलाई काउन्टरमा गएर मात्र टिकट काट्न आग्रह गरे ।
