नेपाली क्रिकेट टोलीले युएईमा जारी युनिटी कप टी-२०आई शृंखलामा वेस्ट इन्डिजमाथि ऐतिहासिक जित हासिल गर्दै एक खेल अगावै शृंखला आफ्नो नाममा लेखाएको छ । सोमबार भएको खेलमा टेस्ट राष्ट्र वेस्ट इन्डिजलाई ९० रनको फराकिलो अन्तरले पराजित गर्दै नेपालले एक खेलअगावै शृंखला जितेको हो ।
नेपालले प्रस्तुत गरेको १७४ रनको बलियो लक्ष्य पछ्याएको वेस्ट इन्डिज ले १७ ओभर १ बलमा मात्र ८३ रनमा अलआउट हुन पुग्यो । वेस्ट इन्डिजका लागि जेसन होल्डरले सर्वाधिक २१ रन बनाए पनि अन्य ब्याट्सम्यानले उल्लेख्य प्रदर्शन गर्न सकेनन् ।
वेस्ट इन्डिजको ब्याटिङ क्रमलाई ध्वस्त पार्ने क्रममा नेपाली युवा स्पीनर आदिल आलमले उत्कृष्ट प्रदर्शन गर्दै ४ ओभरमा २४ रन खर्चेर महत्त्वपूर्ण ४ विकेट लिए । कुशल भुर्तेलले ३ विकेट लिँदा ललित राजवंशी र दीपेन्द्रसिंह ऐरीले १-१ विकेट आफ्नो नाममा दर्ता गराए ।
यसअघि, टस जितेर पहिले ब्याटिङ गरेको नेपालले निर्धारित २० ओभरमा ६ विकेट गुमाउँदै १७३ रनको विशाल योगफल तयार पारेको थियो । नेपालको इनिङ्समा ओपनर आसिफ शेख र युवा ब्याट्सम्यान सन्दीप जोराले अर्धशतकीय पारी खेल्दै उत्कृष्ट प्रदर्शन गरे । आसिफ शेखले संयमित ब्याटिङ गर्दै ४७ बलमा अविजित ६८ रन बनाए भने सन्दीप जोराले आक्रामक रूपमा ३९ बलमा ६३ रन जोडे ।
एक समय ४३-३ को कमजोर अवस्थामा रहेको नेपालको इनिङ्सलाई आसिफ र जोराले चौथो विकेटका लागि १०० रनको सानदार साझेदारी गर्दै बलियो स्थितिमा पुर्याएका थिए । वेस्ट इन्डिजका कप्तान अकिल होसेनले २ विकेट लिँदा काइल मेयर्स र जेदिया ब्लेड्सले १-१ विकेट लिएका थिए ।
यस जितसँगै नेपालले टेस्ट राष्ट्रविरुद्धको पहिलो ऐतिहासिक शृंखला जित्दै अन्तर्राष्ट्रिय क्रिकेट जगतमा आफ्नो बलियो उपस्थिति देखाएको छ । यसअघि पहिलो खेलमा पनि नेपालले वेस्ट इन्डिजलाई पराजित गरेको थियो ।
