विएनतियान । लाओसको प्रविधि तथा सञ्चार मन्त्रालयले महिला उद्यमीहरूलाई डिजिटल युगमा सशक्त बनाउनका लागि डिजिटल सीप विकास, नवप्रवर्तन प्रवर्द्धन र दिगो व्यवसाय वृद्धिमा सहयोग पुर्याउने विभिन्न कार्यक्रमहरू सञ्चालन गरिरहेको छ।
महिला उद्यमीहरूको सशक्तिकरणका लागि मन्त्रालयले हालै एक विशेष प्रशिक्षण कार्यक्रम सञ्चालन गरेको छ, जसले डिजिटल व्यवसाय नवप्रवर्तन, ई–कमर्स, डिजिटल मार्केटिङ, डाटा विश्लेषण, साइबर सुरक्षा तथा अनलाइन व्यवसाय सञ्चालनजस्ता क्षेत्रमा व्यवहारिक ज्ञान प्रदान गरेको छ।
उक्त कार्यक्रमको उद्देश्य सहभागीहरूलाई आवश्यक डिजिटल सीप प्रदान गर्दै व्यवसाय सञ्चालनका जोखिम घटाउने र तीव्र रुपमा अघि बढिरहेको डिजिटल अर्थतन्त्रमा दीर्घकालीन सफलताका लागि सक्षम बनाउनु हो ।
सेप्टेम्बर ४ देखि ५ सम्म राजधानी विएनतियानमा आयोजना गरिएको उक्त तालिममा डिजिटल रूपान्तरण रणनीति, डिजिटल युगमा प्रभावकारी मार्केटिङ तथा व्यवसाय निरन्तरता योजना जस्ता महत्त्वपूर्ण विषयवस्तु समेटिएका थिए । साथै, प्रशिक्षणले अनुभव आदान–प्रदान तथा आपसी नेटवर्किङका लागि पनि उपयुक्त वातावरण तयार गरेको थियो ।
यस पहलमार्फत मन्त्रालयले महिला उद्यमीहरूको भूमिका डिजिटल अर्थतन्त्रमा अझ बलियो बनाउने र बदलिँदो प्रविधि–प्रधान विश्वमा उनीहरूको दीर्घकालीन सफलता सुनिश्चित गर्ने लक्ष्य लिएको छ।
