काठमाडौँ । सरकारले प्रहरी महानिरीक्षक (आईजीपी) मा चन्द्रकुवेर खापुङलाई नियुक्त गरेको छ । शुक्रबार बसेको मन्त्रिपरिषद् बैठकले केन्द्रीय अनुसन्धान ब्युरो (सिआइबी)का प्रमुख तथा प्रहरी अतिरिक्त महानिरीक्षक खापुङलाई आइजिपीमा नियुक्त गर्ने निर्णय गरेको हो।
हालका प्रहरी महानिरीक्षक दिपक थापा यही भदौ १८ गते अवकाशमा जाने भएपछि सरकारले खापुङलाई नयाँ आईजीपी नियुक्त गरेको हो । भदौ १९ गतेदेखि लागू हुनेगरी नेपाल प्रहरीका ३२औँ महानिरीक्षकमा खापुङ नियुक्त भएका हुन् ।
हालका आईजीपी थापासँगै फारम भरेर प्रहरी सेवामा प्रवेश गरेका खापुङ आफ्नो ब्याचका अन्तिम प्रतिस्पर्धी बनेका छन् । तीन चरणमा नियुक्ति दिइएको सोही ब्याचका धेरै सहकर्मीहरू पहिले नै अवकाश भइसकेका छन् ।
पहिलो लटमा नियुक्त बसन्तबहादुर कुँवर आईजी बनेर ३० वर्षे सेवा अवधिपछि अवकाश गइसके । दोस्रो लटका सुदीप गिरी र टेकबहादुर तामाङलाई पछि पार्दै थापा आईजीपी बने, तर उनी पनि यही भदौ १८ मा अवकाशमा जाँदैछन् ।
तेस्रो लटका लालमणि आचार्य र कृष्णहरि शर्मा पोखरेल ५६ वर्षे उमेर हदकै कारण क्रमशः जेठ र भदौ महिनामा अनिवार्य अवकाशमा पुगेका छन् । यसरी प्रशासन विभाग प्रमुखसमेत रहेका पोखरेलको अवकाशपछि खापुङ एकल उम्मेदवार बनेका हुन् ।
यदि नयाँ प्रहरी ऐन लागू भए उनको सेवाअवधि ६ महिना बढ्ने छ, अन्यथा ३० वर्षे सेवा पूरा गरी खापुङ कात्तिक २६ गतेदेखि अनिवार्य अवकाशमा जाने छन्।
