काठमाडौं । साउन महिनाका लागि बैंकहरुले ब्याजदर घटाएको छ । जेठ र असार महिनामा स्थिरजस्तै रहेको ब्याजदर साउन महिनाका लागि फेरि घटेको हो । नेपाल राष्ट्र बैंकको दबाबपछि अधिकांश बैंकहरूले साउन महिनाका लागि घटाएर निक्षेप ब्याजदर सार्वजनिक गरेका छन् ।
गत शुक्रबार राष्ट्र बैंकले मौद्रिक नीति सार्वजनिक गर्दै नीतिगत दरलाई ५ बाट ४.५ प्रतिशतमा झारेको घोषणा गरेको थियो । त्यस्तै स्थायी तरलता सुविधा दर ६.५ बाट ६ प्रतिशत र स्थायी निक्षेप सुविधा सङ्कलन दर ३ बाट २.७५ प्रतिशतमा झारियो । यसले बैंकहरूलाई ब्याजदर घटाउनका लागि दबाब पुगेको हो ।
बैंकहरूले बुधबार सार्वजनिक गरेको नयाँ ब्याजदर तालिकाअनुसार असारको तुलनामा साउनमा व्यक्तिगत मुद्धतीको अधिकतम औसत ब्याजदर ०.२१५ प्रतिशत बिन्दुले घटेको छ ।
असार महिनाका लागि व्यक्तिगत अधिकतम मुद्धतीको औसत ब्याजदर ५.९०२ प्रतिशत रहेकोमा साउन महिनाका लागि यो ५.६८७ मा कायम भएको छ ।
