सुनसरीबाट सुरु भएको प्रदर्शन मधेसका विभिन्न जिल्लामा फैलिन थालेपछि सुरक्षा निकायले मधेस प्रदेशभर उच्च सुरक्षा सतर्कता अपनाएको छ।
गृह मन्त्रालयका एक उच्च अधिकारीका अनुसार सुरक्षा समन्वय र अवस्थाको प्रत्यक्ष अनुगमनका लागि सशस्त्र प्रहरी बलका एआईजी गणेश ठाडामगर र नेपाल प्रहरीका एआईजी हिमालय श्रेष्ठलाई जनकपुर पठाइएको छ। दुवै जना जनकपुर पुगेर सुरक्षा अवस्थाको निगरानीमा खटिएका छन्।
सप्तरीदेखि पर्सासम्मका जिल्लामा सुरक्षा व्यवस्था कडा पारिएको छ भने सम्भावित अप्रिय घटना रोक्न नेपाल प्रहरी र सशस्त्र प्रहरीले संयुक्त रूपमा सुरक्षा निगरानी बढाएका छन्।
यस्तै, बारा र पर्सा जिल्लाको सुरक्षा समन्वयको जिम्मेवारी दिँदै प्रहरी प्रधान कार्यालयले एसएसपी होबिन्द्र बोगटीलाई पनि खटाएको छ। बोगटी यसअघि प्रहरी प्रधान कार्यालयअन्तर्गत राजमार्ग सुरक्षा तथा ट्राफिक व्यवस्थापन महाशाखामा कार्यरत थिए।
