अमेरिकी राष्ट्रपति डोनाल्ड ट्रम्पले भारतसँग व्यापार सम्झौता लगभग अन्तिम चरणमा पुगेको संकेत दिएका छन् । मंगलवार भारतका लागि नवनियुक्त राजदूत सर्जियो गोरको शपथ ग्रहण समारोहमा बोल्दै उनले छिट्टै भारतमाथिको ट्यारिफ पनि घटाइने बताएका हुन् ।
राष्ट्रपति ट्रम्पले सम्बोधनका क्रममा भने, ‘हामी अहिले भारतसँग नयाँ सम्झौता गर्दैछौँ । अहिले उनीहरू मलाई खासै मन पराउँदैनन् तर फेरि हामीलाई मन पराउनेछन् । हामी न्यायोचित व्यापार सम्झौताकै नजिक छौँ । उनीहरू निकै कुशल वार्ताकार छन, त्यसैले सर्जियो, तपाईंले ध्यान दिनु पर्नेछ । सबैको हित हुने सम्झौता लगभग तय हुँदैछ ।’
शपथ ग्रहण समारोहपछि ओभल अफिसमा पत्रकारहरुसँग कुरा गर्दै ट्रम्पले भारतसँगको व्यापार सम्झौता कति नजिक छ भन्ने प्रश्नमा प्रतिक्रिया दिएका थिए । भारतमाथिको ट्यारिफ घटाउने विषयमा उनले भने, ‘रुसको तेलका कारण भारतमाथि उच्च ट्यारिफ राखिएको थियो, तर अहिले रूससँगको तेल कारोबार निकै घटेको छ । त्यसैले उचित समयमा हामी ट्यारिफ तल ल्याउनेछौँ।’
यसअघि, नोभेम्बर ५ मा भारतका वाणिज्य तथा उद्योगमन्त्री पियुष गोयलले भारत–अमेरिका व्यापार सम्झौताका छलफल सकारात्मक रूपमा अघि बढिरहेको बताएका थिए । तर, धेरै संवेदनशील र गम्भीर विषयहरू रहेकाले समय लाग्ने उनको भनाइ थियो ।
दुबै देशबीच २०२५ को अन्त्यसम्म पहिलो चरणको द्विपक्षीय व्यापार सम्झौता सम्पन्न गर्ने उद्देश्य राखिएको छ । हालसम्म पाँच चरणको वार्ता सम्पन्न भइसकेको छ भने अक्टोबर २३ मा दुबै देशका वार्ताकारबीच भर्चुअल छलफल भएको थियो ।
यो व्यापार सम्झौताले दुई देशबीचको व्यापार कारोबार १९१ अर्ब अमेरिकी डलरबाट २०३० सम्म ५०० अर्ब डलर पु¥याउने लक्ष्य लिएको छ ।
मन्त्री गोयल यसअघि सेप्टेम्बरमा अमेरिकामा उच्चस्तरीय वार्तामा सहभागी भएका थिए । त्यस्तै, अमेरिकी सहायक व्यापार प्रतिनिधि ब्रेन्डन लिञ्चको नेतृत्वमा अमेरिका टोलीले पनि सेप्टेम्बरमै नयाँदिल्लीमा भारतीय वाणिज्य विभागसँग ‘सकारात्मक र दूरदर्शी’ छलफल गरेको र शीघ्र परिणाम निकाल्न प्रयास तीव्र बनाउने निर्णय गरेको थियो । दुवै देशबीच विश्व व्यापार विस्तार तथा आर्थिक साझेदारी सुदृढीकरणका लागि यो सम्झौता महत्वपूर्ण मानिएको छ । एएनआई
