सिडनी-स्ट्राथफिल्ड नेपाली कम्युनिटीले डिसेम्बर १५, २०२४ मा वार्षिक अन्त्य कार्यक्रम आयोजना गर्यो। विद्यार्थी, अभिभावक, हजुरआमा-हजुरबुबा र समुदायका सदस्यहरूको सक्रिय उपस्थितिले कार्यक्रमलाई भव्य बनायो। नेपाली भाषा, संस्कृति र शिक्षाको प्रवर्द्धन गर्ने उद्देश्यले आयोजित यस कार्यक्रममा नयाँ पुस्ताका शैक्षिक र सांस्कृतिक उपलब्धिहरूको उत्सव मनाइएको थियो।
कार्यक्रमको मुख्य आकर्षण साप्ताहिक नेपाली कम्युनिटी स्कूलका विद्यार्थीहरूलाई प्रदान गरिएका प्रमाणपत्रहरू थिए। यी प्रमाणपत्रले उनीहरूको नेपाली भाषा र संस्कृति सिक्ने प्रयासलाई सम्मान गरेको छ।
अभिभावक र हजुरआमाबुबाको उपस्थिति र सक्रियताले नयाँ पुस्तामा परम्पराको हस्तान्तरण सुनिश्चित गर्ने विश्वासलाई बलियो बनाएको छ।
कार्यक्रमकै क्रममा अभिभावकहरूको बैठक आयोजना गरिएको थियो। बैठकमा बालबालिकाको शैक्षिक प्रगति र सुधारका योजनाहरूको विषयमा छलफल भयो। स्ट्राथफिल्ड क्षेत्रमा ठूलो नेपाली कम्युनिटी स्कूल स्थापना गर्ने प्रस्ताव पनि बैठकको मुख्य एजेन्डा रह्यो। यस विद्यालयले दोस्रो पुस्ताका बालबालिकालाई नेपाली भाषा, संस्कृति र परम्पराको ज्ञान दिलाउने लक्ष्य लिएको छ।
स्ट्राथफिल्ड नेपाली कम्युनिटीका अध्यक्ष सन्तोष न्यौपानेले भने, “यो कार्यक्रमले समुदायका सदस्यहरूलाई एकताबद्ध बनाउँदै हाम्रो पहिचान र परम्परालाई संरक्षण गर्न थप प्रेरित गरेको छ। २०२५ मा नयाँ योजनाहरू कार्यान्वयन गर्दै हामी अझ प्रभावकारी रूपमा अघि बढ्नेछौँ।”
कार्यक्रमको अन्त्यमा सहभागीहरूले नेपाली परिकारको स्वाद लिँदै नयाँ वर्ष २०२५ का लागि शुभकामना आदानप्रदान गरे।
साप्ताहिक नेपाली कक्षाका लागि स्थान उपलब्ध गराएको र २०२४ का लागि आर्थिक सहयोग प्रदान गरेकोमा स्ट्राथफिल्ड काउन्सिललाई आयोजकहरूले धन्यवाद व्यक्त गरे। यो सहयोगले नेपाली समुदायका गतिविधिलाई अझ प्रभावकारी बनाउन महत्वपूर्ण भूमिका खेलेको छ।
