काठमाडौं। काठमाडौं महानगरपालिकाले भौतिक पूर्वाधार तथा यातायात मन्त्री रघुवीर महासेठलाई दैनिक एक ट्रक धुलो उपहार पठाएका छन्।
मेयर बालेनले मिनभवनस्थित सडक डिभिजन कार्यालय र बबरमहलस्थित सडक विभाग अगाडि एक एक ट्रक धुलो खन्याएका हुन् ।
कलंकीदेखि महाराजगञ्जसम्म रिङरोड विस्तारको नाममा जनताले धेरै धूलो र कष्ट व्यहोर्नुपरेको भन्दै महानगरले सांकेतिक विरोध स्वरुप धुलो खन्याएको हो ।
विगत १५ वर्षदेखि काठमाडौंको जनताले कलंकीदेखि महाराजगञ्जसम्म रिङरोड विस्तारको नाममा धेरै धूलो र कष्ट व्यहोर्नुपरेको महानगर प्रमुख बालेन शाहले सामाजिक सञ्जालमा उल्लेख गरेका छन्।
सरकारले गरेको गल्ती कमजोरीको काठमाडौं महानगरले अकारणमा गाली खानुपरेको उनले बताएका छन्। कलंकीदेखि महाराजगञ्जसम्म रिङरोड विस्तारको काम अघि नबढेसम्म हरेक दिन भौतिक पूर्वाधारमन्त्री रघुवीर महासेठलाई पायक पर्ने ठाउँमा एक ट्रक धूलो उपहार पठाउने बालेनले उल्लेख गरेका छन्।
बालेनले यस्तो भनेका छन्:
माननीय भौतिक पूर्वाधार तथा यातायात मन्त्री रघुवीर महासेठज्यू !
तपाईंको ठाडो आदेशले भइरहेको कुनै काम रोक्न सक्नुहुन्छ भने त्यही आदेशले बनाउन पनि सक्नुहुन्छ होला। विगत १५ वर्षदेखि काठमाडौको जनताले कलंकीदेखि महाराजगन्जसम्म रिङरोड विस्तारको नाममा धेरै धुलो र कष्ट व्यहोर्नु परेको छ। काठमाडौंमा हुने आधा भन्दा बढी प्रदुषणमा त्यहाँ कै धुलोको हात छ, जसले गर्दा महानगरवासीले धुलोधुँवा खानु परेको छ, त्यो बाटो प्रयोग गर्नुपर्नेहरूले सवारी साधन मर्मतमा खर्च बढी गर्नु परेको छ, पुग्न अबेला भोग्नु परेको छ। र, काठमाडौं महानगरले अकारणमा गाली खानु परेको छ।
यो धुलो जनताले मात्र खाँदा राम्रो देखिदैन। जबसम्म तपाईं काम अगाडि बढाउनु हुन्न, हरेक दिन तपाईंलाई पायक पर्ने ठाउँमा एक ट्रक धुलो उपहार पठाउनेछु माया सम्झेर स्वीकार्नु होला।
