भदौ २३ गते सरकारले जेन जी उमेर समूहका युवाहरूको प्रदर्शनमा गरेको दमनमा ७२ जनाको ज्यान गएपछि नेपालको सत्ता–राजनीतिको मार्गचित्र नै परिवर्तन भएको छ ।
प्रत्यक्ष निर्वाचित कार्यकारी प्रमुख, संविधान संशोधन र आर्थिक समानताको मागसहित सुरु भएको यो आन्दोलनपछि तत्कालीन प्रधानमन्त्री केपी शर्मा ओलीलाई समेत बालुवाटार छाडेर सैनिक हेलिकोप्टरमार्फत भाग्नुपर्ने अवस्था आएको थियो ।
तर आन्दोलनले उठाएको न्यायोचित मागलाई ओझेल पार्दै केही व्यक्तिहरूले फाइदा लिन खोजेको आरोप लागेका छन् । गृहमन्त्रालय स्रोतका अनुसार पूर्व डिएसपी गोविन्द पन्थीको संयोजनमा सिंहदरबार पुगेको एक समूहले भन्सार र सीडिओ कार्यालयमा समेत आफ्नो भाग माग्दै गृहमन्त्रीलाई भेट्ने प्रयास गरेको छ ।
उक्त समूहमा नेकपा एमाले निकट अखिल क्रान्तिकारीकी विद्यार्थी नेतृ जस्मिन ओझाको नेतृत्व रहेको र पूर्व खानेपानी मन्त्री विना मगरको किर्ते हस्ताक्षर प्रकरणमा पक्राउ परेका सञ्जिव दाहाल समेत सहभागी रहेको मन्त्रालय स्रोतले जनाएको छ ।
स्रोतका अनुसार उनीहरू सक्कली जेन जी कार्यकर्ताको नाममा गृहमन्त्रालय पुगेका थिए । तर छलफलकै क्रममा उनीहरू नक्कली भएको खुलेको बताइएको छ ।
‘हामीले सुरुवातमा सक्कली जेन जी हो भनेर कुरा सुन्ने कोशिस गरेका थियौँ, तर पछि थाहा भयो उहाँहरू त नक्कली जेन जी रहेछन्,’ एक गृहमन्त्रालय स्रोतले भन्यो, ‘किर्ते अभियोगमा पक्राउ परेका व्यक्तिसमेत आफूलाई जेन जी भन्दै आएका थिए ।’
दियो पोस्ट डटकमबाट
