नेपाल आयल निगमले इन्धनको मूल्य वृद्धि गरेको छ। सोमबार बसेको संचालक समितिको बैठकले पेट्रोलको मूल्य प्रति लिटर ४ रुपैयाँ र डिजेल तथा मट्टीतेलको मूल्य प्रति लिटर ३ रुपैयाँले बढाउने निर्णय गरेको हो। निगमका प्रवक्ता मनोज ठाकुरले यसबारे जानकारी दिएका छन्।
नयाँ मूल्य सोमबार राति १२ बजेदेखि लागु हुनेछ। मूल्यवृद्धिपछि काठमाडौँ उपत्यकामा पेट्रोल प्रति लिटर १७१ रुपैयाँ र डिजेल तथा मट्टीतेल प्रति लिटर १६० रुपैयाँ पर्नेछ। निगमले मूल्यवृद्धिको कारण भारतबाट आएको नयाँ मूल्य सूचीमा भएको वृद्धि रहेको बताएको छ।
